Қазақ поэзиясының дарабозы

Қазыналы Қарағандыға ат басын тіреген арда тұлғалар қасиетті қара шаңыраққа соқпай кетпейді. Бұл жолы кітапханамыз Алаштың аспантау ақыны, ұлт жанашыры – Мұхтар Шахановты құрметті қонақ етіп, оқырмандармен кездесу кешін ұйымдастырды.
"Тағылым" танымдық-интеллектуалды клубының аясында өткен кездесуді айтыскер ақын Айтбай Жұмағұлов тізгіндеді. Жиналған жұртпен амандасып алған соң, алпауыт ақынға сөз берілді. Әдебиет жайлы өрбіген әңгімені оқырман қауым қызыға тыңдады. Ұлт болмысы, тіл тағдыры да назардан тыс қалған жоқ. Кеш барысында қаламызда өткен "Тұлға" халықаралық байқау-фестивалінде бас жүлдені қанжығасына байлаған Аяжан Таласбаева сахна төріне шақырылып, ақынның өлмес өлеңін оқып берді.

Кітап – мәдениет пен руханияттың алтын көпірі

20-23 сәуір аралығында кітапханамызда Дүниежүзілік кітап және авторлық құқықты қорғау күніне және ЭКСПО-2017 мамандандырылған көрмесіне арналған "Кітап – мәдениет пен руханияттың алтын көпірі" атты Кітап фестивалі өтті. Фестиваль аясында оқырмандарға әртүрлі форматтағы шаралар ұсынылды.
Биылғы жылы аталып отырған тарихи дата – Алаш қозғалысының 100 жылдығы да ерекше назарда болды. Қарағанды политехникалық колледжінің студенттері "Әлихан Бөкейханов" атты қойылым ұсынды. Жастар қазақтың көрнекті қоғам және мемлекет қайраткері, "Алаш" партиясының жетекшісі Ә. Бөкейхановтың және оның замандастарының образын шеберлікпен сомдады.
Е.А. Бөкетов атындағы Қарағанды Мемлекеттік университетінің "Тұлғатану" ғылыми-зерттеу орталығымен бірлесе жұмыс істейтін "Тағылым" танымдық интеллектуалды клубында Н. А. Бейсенбекова, Г.М.Смағұлова, Л.К.Шотбаковалардың "Әлихан Бөкейхан - ұлт мақтанышы" монографиясының тұсаукесері өтті. Шараны әдеттегідей белгілі айтыскер Айтбай Жұмағұлов жүргізді. Кітап мерекесіне арнайы шақырылған мектеп кітапханашылары шара барысында туындаған сұрақтарына жауап алып, болашақта бірлесіп жұмыс істеуді ұйғарды.